2014年8月@17人沙巴之旅@第一日

我們一早7點已在機場T2集合


去到機場當然第一時間要派行程表，地圖比大家

經過幾個月的資料搜集
對沙巴也認識多咗！

今次我們是坐AA，9:55機去

齊人後當然要同行李影番張大合照啦

在辦登機手續時

我們已遇到強國人打尖

好在我地發現咗！

我們17人也有13喼行李....

不過地勤人員工作都好有......「效率」

令我們原本預食早餐的時間都少咗
加上又要行番去T1入閘

所以我地臨時決定係T2果間澳門XXX食

LEO同恩恩就醒目揀BURGER KING

因為果間澳門XXX真係好難食啊.....

因為我們坐AA，所以今次我地要坐巴士去上機

因之前坐過HK EXPRESS去台中
所以知道廉價航空要預多點時間去登機
去到另一個登機位都有小小商店


不過風景唔錯啊
可近距離見到飛機升降
上機前都影番張相先

在飛機裡因穿過兩舊大黑雲
所以架機唔係好穩定
（天氣問題，同機師功力無關）


菜苗就好驚
我話：因我地會經過雷公伯伯屋企
所以會震囉，或者你合埋眼啦，好快就無事！
合合吓菜苗就瞓著咗啦！


話唔快話就到沙巴
係飛機望落去見到D島
好想快D跳落水！


落機啦！


大家拖住手提行李準備入境


聽TONY講原來呢個機場係屬AA
個機場比較簡陋，但好有FEEL
因為可以近距離睇到飛機升降
菜苗睇到嘩嘩聲，好攪笑！

因為沙巴機場都好細
所以辦入境手續間房都好細
條龍要排到出面
咁多人只開三個COUNTER
又要打手指模
所以真係有排等
菜苗見我地打手指模
佢以為自己都要
但因為係小朋友所以無得打
佢好失望啊！哈哈！

攪掂咗証件就要去攞行李
佢細到只有兩條LINE
一眼睇晒
 我地好快就認到13件行李
因每件都有我特登自製的行李牌
所以好易認
我諗住會好順利過關
點知我件行李要打開抽查
其實全喼都係菜苗D奶奶和日用品


個關員攞咗兩次佢支奶奶嚟望
而我地16人就圍住佢，哈哈！
我心諗：你係咪想飲啫，送支比啦！哈哈！
最後都比我地順利過關。
但我個喼比人掉到無咗三隻腳
唉......好在係300元的淘寶貨

一出去等咗一陣就見到TONY用小巴接我地
 部份行李放係車尾
由於我地有17人
差不多包車


車程只係15至20分鐘就到HORIZON酒店


因我地要8間房
所以有部份房都未執好
於是我地就搬晒行李去其中一間房做總部
然後TONY帶我地去隔離唱錢


同埋GAYA街怡豐食叻沙


TONY自己帶咗1000蚊散紙唱比我地
方便我地買野（都算貼心照顧啊）


我地覺得怡豐叻沙唔及新加坡濃味


牛雜粉都係一般
反而個沙煲雞飯同埋個桔仔冰好好味
沙煲雞飯有半熟蛋
撈埋D飯一齊食好好味


仲有個桔仔冰係我地全個行程咁多日最好飲的
因佢有加檸檬同埋好夠味


我地17人食埋單只係180蚊
個個都話好抵食！


食完野我地返酒店準備去泳池游水
順便攞埋另外幾間房
我地估唔到我地要8間房裡
有幾間都Upgade咗我地去套房
因我地KingSize床，所以好大間呀
仲有埋桑娜焗呀！


我地有部份人就留係房嘆紅酒
有部份人部去6樓泳池游水
個泳池唔係大
但佢可以望到個海
好舒服啊！


當然要影番D相留念啦!






玩到6點我地就返房沖涼
因我地約咗630係大堂集合預備食晚飯

我地去食肉骨茶
一出酒店向左轉行10分鐘已有新記沙煲肉骨茶
其實再行後面街有佑記
不過我地想試沙煲
正所謂膽大過沙煲點都要試下
我地覺得最好味係黃酒蝦，肉排，豬腰



仲有椰子布甸，好有椰子味！


差不多食完我地聞到香味
原來有一架榴連車泊咗係我地隔離
佢打開小小車門都好香
我地見新記老板都推介我地幫襯佢
所以我地就叫咗個105元的貓山王試吓！
 不到5分鐘已支解咗個貓山王
果然真係好甘香
 大家意油未盡再叫一個D26試下
都好食喎，不過貓山王香D
檔主好好客仲不斷請我地食山竹
任攞任食，好好人！





食完我地沿海邊散步
沙巴的夜晚唔係好熱
可能近海，所以海風吹來好舒服
我地經過食野既夜市
但TONY叫我地唔好今日試
如果要試就最尾果日先去
因唔太衛生，萬一有咩事都返香港先疴
比佢笑C咗！

 行到見到條綠色天橋
我地轉咗入去
原來係榴連街

傻姨又走埋去問吓
檔主話係貓山王
傻姨叫佢比榴連個Patpat佢睇下都唔見有「星」
反而頭先果檔唔洗叫佢都自動比你睇
仲要係好大粒「星」
於是傻姨「大」佢話唔係貓山王
果然比佢大倒
但擋主即刻換另一個話係貓山王
當然都係唔見粒「星」啦
所以我地無幫襯走咗
大家仲讚傻姨勁呀！


返到去酒店大家沖好涼就係總部集合
總部係MARY間房，同樣upgade咗係套房
所以17人入晒去都唔會迫
而我同老公就去樓下便利店買啤酒，雪糕返來一齊嘆
酒店樓下都有兩三間便利店





有好多小食買，好方便

今次MARY自己帶咗個煲去
仲帶埋魚干，蝦干去比大家宵夜送酒


就係吹吹水的環境吓過咗沙巴的第一晚......

2014年8月@17人沙巴之旅@第二日

第二天，我地瞓咗一晚就去食酒店早餐，款色中等，ookk啦

食完就出發去行sunday market。

初時以為在房間望落去唔係好大啫，好快就行完，
但入咗去轉左原來係一條好長既街，擺滿檔仔，
好多地道和非地道野買，又曬又熱，真係行到成身濕晒，
我地行咗個半鐘，只行咗一半咋，
因實在太熱了，最終我們行到去飲白咖啡餐廳既路口就放棄了。

雖然早餐未落格，但點都要去試下五星海南雞飯，
不過一坐低大家都叫野飲先，要降下温，
我同呀仔叫咗鮮窄青蘋果汁，原來真係好好味，好味過桔仔冰。

呢間五星海南雞飯最好味都係D雞，好滑啊，其他都係一般。

時間差不多，TONY約了我地１點半係大堂等

準備出發去睇螢火蟲，事前已叫大家著長褲，所以個個都換衫。

大家好準時，因我地人多，所以通常我地會約早15分鐘等，
免要TONY等我地，擔誤時間。
原來我地去睇螢火蟲要坐成2小時車程
加上食飽飯，上車不久全車人都瞓晒了
去到半路中途TONY安排我地落車去小檔買生果食順便去廁所
 

上車無耐見個天黑過墨斗
跟住就落大大大大大雨，仲行埋雷添
我地都擔心落咁大雨會唔會見唔到螢火蟲和長鼻猴呢？
TONY都話要睇吓大家好唔好彩啦！

坐咗1小時車，終於都到碼頭啦，
但都仲落緊大雨
我地唯有買雨樓著住上船
上船先去食個超簡單的地道下午茶

事前已在網上知道係好簡單，所以大家對呢餐沒有期望！


出發了！
我和TONY坐船頭
佢負責講解，我負責影相。

船一開，涼風吹來好舒服
行無耐就見到有幾隻馬騮
船家即時提供望遠鏡（之前上網話要收費，但我見係免費使用）
見到有兩個家庭的馬騮在「迎賓」
完全唔怕人架！任我地影相都唔會走
 船家再去其他地方帶我們看
最後都揾到長鼻猴
好在我有帶長鏡
所以影得好清楚

 




在途中TONY話呢度有鱷魚架
所以如果有人跌落水會好危險
點知就比我地兩次見到真既鱷魚.......
不過係BB嚟既

佢地藏在草下面，凸出小小個頭
但都比我地見到
當然影番兩張相先啦！
 睇咗成個鐘長鼻猴係時候返去食晚飯
回程時船家泊我們上沙灘
看美麗而浪漫的日落
真係好靚架！
但同時見到船家落船
大家都唔知咩事
只見佢跑到好遠
............
原來船家小解，哈哈哈


 返到碼頭大家影下日落



四處行行
然後吃過簡單的自助晚飯後
又出發去看螢火蟲
天黑了，加上有海風真的有點凍
不到5分鐘便到
TONY話今日有超級月亮
因為月亮的光也會影響螢火蟲的數量
好在月亮未見到，所以個天好黑
我們真的看到綠色發光點點在天上飛
好似聖誕樹咁閃呀閃呀
真係好靚！
船家用佢綠色燈引佢地埋嚟隻船度
我地都好小小捉佢地放在掌心
慢慢欣賞
因唔想整死佢地
他們是屬於大自然的
我曾在網上見到有人用玻璃樽入咗幾隻返酒店
到第二朝全部死晒
令我回想起肯亞名言：
大自然係我們問子孫借返來的！
 我第一次咁大胆放螢火蟲係手中比菜苗睇
平時我好怕昆蟲
可能因為天太黑
眼裡只見到綠光
可能當我見到佢「真身」時
或者我真係會大叫起來！
哈哈哈

最初我都諗緊去唔去睇螢火蟲好呢？
因車程好遠
好在最後得到團友意見決定去睇啦
好在沒有錯過！

回程時都係落好大雨
我地在雙天落車，諗住食宵夜
初初TONY介紹可以去雙天後面食串燒
如果唔合心水，可以再向前行去食富源
最綜我地都係去食咗富源
叫咗成十幾件咖也面包
個個都話好好味
食完就慢慢行返酒店
原來真係好近
10分鐘便到了




因第三天激流團要一早起身
所以大家返酒店都沖涼瞓覺了！

事後我發見我被牛蚊咬咗31粒
痕到我返到香港要食葯先得。
原來係敏感原擴散
其實我已著長衫和帶蚊怕水但都有31粒！