菜苗趣事 10 ＠ 小聚會

2011-6-27

昨日同菜苗去了好朋友的聚會，
因為菜苗仲好細，
未識得同哥哥姐姐一齊玩
聚會中有４位小朋友由k１至小一
菜苗自己玩玩具，
拿著個桶拿玩具出來，
又放回入去.......
不斷重複拿出來放入去，
拿出來放入去.....自己都玩到好開心！
 
好多玩具呀....勁開心！

昨日見到uncle就笑，
仲撩人笑...傻笑...哈哈哈！

到回家沖好涼在地墊上玩，
教他byebye時，
他望著我隻手的動作
然後........「樹」起隻手指公！！
笑死我地！

菜苗趣事 9 ＠坐

2011-6-20

（坐）
係呢個假期，
菜苗已學識好穩陣咁自己坐係度，
上星期都係東歪西倒架，
因為佢六個月時daddy買咗個按掣玩具比佢，
佢好鍾意玩，
所以呢個星期一有時間就多d比佢係坐𥱊度坐係度玩
可能坐得多，
慢慢可以坐得好穩陣，
現在可以比佢自己坐啦！
 
佢見到大公仔就會咁.......

 
菜苗自己識坐啦!


（爬）
至於爬就仲未識，
但佢已有意識曲腳，
仲「吉」起個patpat，
好攪笑！

（沖涼）
呢兩三日沖涼就真係成身濕晒啦，
因為之前菜苗沖涼鍾意young水
但現在鍾意用手拍打水
攪到我下半身濕晒，
佢見你wawa咁叫，
佢就再拍多兩下！！！！頑皮豬........

（跳）
佢未學行先學跳
呢幾日仲要雙腳縮起來跳
不過我睇過d文章，
呢個係學行的先兆，
係一個對腳仔好好的鍛練！

（學行車）
菜苗現在係屋企坐學行車已可以走來走去啦！
有一日仲將電視柜所有電線拉晒出來
激死婆婆.....仲打開晒個廳d柜桶
現在爸爸開始為個廳個電視柜煩惱
要點執....菜苗才唔會拉晒d野出來呢？
 
菜苗今朝早過我起身坐學行車玩，
見到我食早餐，仲要食埋一份，
見我穿襪出門口時就眼甘甘ee鵝鵝以為去街，
最後佢都乖乖地坐係婆婆身邊同婆婆唸經！

（牙仔）
佢門前下面對門牙好明顯見到佢開始腫腫地
同埋可以清楚見到佢牙印
雖然未出牙仲吽緊
但我諗最遲下個月就會出來同大家見面啦！

（粥）
現在菜苗唔係咁鍾意食粥，
可能比較稀
佢鍾意食爛飯多d
所以地現在都係煮d爛飯仔
然後將d餸放埋落攪伴機度攪
近排都食過南瓜，菜心，魚，瘦肉，薯仔，西蘭花
佢可以一碗食到三分二架！
可能食得多，
所以日日bubu都疴得好多份量！

 
菜心魚肉粥，
以粥來講比較杰，
以飯來講比較爛！

菜苗趣事 8 ＠ 打針

2011.6.11
一早帶咗菜苗去健康院打六個月的針，
因為每次出街都要較好晨早果支奶的時間
不然就會攪到係唔適合的地方食奶
果朝我自己較咗鬧鐘五點
但自己瞓過龍....(^_^‘)
六點才起身比奶佢食！
原本我地約咗10點打針
最後我地都早小小上健康院開奶比菜苗
不過心諗佢未必會食，
因為環境太多人，太多新奇野佢會唔食奶
結果....真係唔食....╮(╯_╰)╭
到叫佢名我地就入去脫清光磅重
其實每次一開咪叫佢個名，
我就好緊張同興奮！
今次入去磅重同之前的感覺唔同了
今次真係覺得呢個仔大個咗好多
因為次次都要就住佢d手腳除衫
今次好明顯佢係硬鄭咗好多
一放落磅，
個傻佬就對住個姑娘笑！＞叻仔啊！.....(*^．^*)
今次係17磅（7.73安士）約68cm高

我記得第一次同佢去健康院磅重時
佢除晒衫放落個磅度...好驚
一對手仔四圍找野捉
仲驚到喊添，
最慘姑娘唔比我地捉住佢
果刻我真係眼都紅晒....(〒︿〒)
磅完我地即刻抱起佢...心都痛埋.....
果刻真係想鬧個姑娘！.....(>_

打針針 喊到好凄凉

到見姑娘時，同佢測試埋佢發展進度
全部都好正常，同埋成日望住個姑娘笑！
氹到個護士長好開心！哈哈哈！
不過姑娘話要訓練佢腳踭要到地
所以想佢九個月時再返去check下！
氹完個護士長就係出面等叫名打針，
但佢都係唔食奶.....可能心知不妙.....
到再叫佢名入去打針時
我地心情就好似行刑咁！
當然打針佢一定會喊，
仲喊出好大好大的眼淚
....嗚...嗚...嗚...嗚... 心都痛埋！
但最好笑係喊完終於肯食奶啦！哈哈哈！
可能知道要打針，所以打完要飲奶補番！

打完健康院，再要去打私家
所以打完左邊要再打右邊
不過去私家就好好多
雖然佢都喊，
但會喊住笑！
因為d姑娘又靚女d，
而且有玩具比佢攞住，
所以佢好快就唔喊啦！
不過上次打完針，
一對大肶都腫起咗一粒
要成個月先至散
不過今次好在無腫起.....

因為上次打完針佢都發燒咗一日（小小間中慶慶地）
所以今次我都請定星期一的大假去湊佢啦！
佢只係星期六日有小小慶
星期一都無事lu，
我地係佢要打針前已為佢唱題，
而且比定開奶茶佢飲
所以今次咁叻仔.....
下次再打針已經一歲啦！

菜苗趣事 7 @ 開心BB

菜苗現在可以自己坐BB椅，
不過就好為食，
佢基本上咩都食，
但我地偏向比飽飽佢食，
因為無油份，
佢可以自己食晒一至兩個叉燒飽的飽皮！

我係開心菜苗

如果你手上攞住個飽，
佢會「蝦」你為佢食，
直至你手上無飽飽為止，
佢就會自己停！除咗飽，佢仲會食橙，蛋糕，瓜，魚......
一有野食落肚，佢就興奮到不停起勢郁
舞手舞腳.....似十足我！

但當佢食緊奶奶時見到有其他野食，
佢會即時用手抹開支奶，要食果d野！
有一次我地同佢去完街回家搭𨋢，
同𨋢有位哥哥手拿著魚蛋放落口，
佢見到人地串魚蛋，
眼甘甘不特止，仲吞口水....⊙ . ⊙
攪到我地超唔好意思......
果然係為食bb！

菜苗趣事 6 ＠ 游水超人

昨日端午節，天氣又熱，加上傳統話游龍舟水身體會健康d！
所以我地預備好所有裝備：水泡，腰用水泡，尿片泳衭，沖涼盆，毛巾....（共兩大袋）
帶菜苗去嘗試佢人生第一次游水！
早上同嫲嫲飲完茶回家食埋糊，同埋婆婆一齊去西貢，
出門前已為菜苗裝扮作超人b！superB！
著起件衫同佢玩飛呀....佢就開心到不得了！

食酸梅乾變超人

收拾好行李便一抽二袋地出發....未入到西貢菜苗就已經瞓咗！
入到更衣室就要整醒佢換衫....佢剛剛瞓醒好似呆雞咁....我地用個膠袋lup住佢個頭經過洗身出口（驚佢驚）
去到泳池我地先在bb池熱身，
以往佢沖涼時，一遇到水就會不停young
但今次唔會，佢靜靜地坐係度，
我地就開始有d擔心....佢見水d興奮無咗...死啦！會否驚咗水呢？？...
我地三個陪佢坐咗一陣都無咩起色，
最後同佢上番岸等佢休息下
佢就一路四圍望，好似好新奇咁.....後來我地轉咗去練習池，
d水大約到我腰左右，
我地用腰水泡試下比佢落水玩，
佢都係唔知發生咩事....繼續呆雞....我地係水裡用手教佢young，
教咗一陣佢開始有反應
有mood地young了幾下......
於是我地換了個頸用水泡
佢手腳都可以係水裡自由地郁
wa.......佢即時興致到對腳不停地young

我自己識游水啦....yeah.....

我地三個才放下心頭大石.....見到佢玩得咁開心，我地仲開心！哈哈哈！
平時菜苗經常都「拮」起個肚，
佢係水裡都係咁，
仲識young腳....真係自己游到背泳.....我地三個係池邊開心到跳了起來！
我地都好興奮.......
菜苗就係佢超興奮的狀態下展開咗佢今年今世第一個下水禮
游完水之後，佢攰到瞓著咗......

 

我自己識游水啦....yeah..... 

菜苗趣事 5 @ 翻左翻右

2011-5-30

上星期為了方便菜苗b學爬，
我地買咗２pack砌的維尼墊放在廳中間
我地放菜苗落去玩，
佢鍾意翻左翻右！

有一晚我散會回家，
見到菜苗趴在墊上唔郁，
好靜.......你估佢係度做咩？
原來佢係度偷lam維尼樽蜜糖......＠o＠
笑死我地！又望住粉紫色的驢仔係度講野！
同驢仔傾偈...ee...oo.....

笑死人！！！哈哈哈！

菜苗趣事 4 @ 煲粥仔

2011-05-22

未到六個月(差一日)
就急不及待煲粥仔比佢食啦...
第一次食就麻麻地....
所以加咗支奶補充第一餐粥:
瘦肉味+紅蘿蔔+小小蛋黄

食咗一碟仔+奶

2011-05-23
第二餐粥: 瘦肉味+南瓜+小小蛋黃
食咗2碟仔+奶
其實只有南瓜味.....

2011-05-24
第三餐粥: 瘦肉味+蛋黃>>加強瘦肉味
食咗2碟仔+5安奶
今次好好味...好香瘦肉味啊...